媽媽好細個果陣同兄弟姊妹係紅磡山谷道木屋區一齊住。但因為一場大火而被迫要逃離果度。翻查記錄，應該係1961年，即係媽媽大約3歲嘅時候。佢成日講姨媽果陣救左佢一命，因為姨媽一手擸住佢，一手攬住棉胎逃離大火（想像下個畫面都似係拍緊戲！）

至於點解係棉胎，係因為當時嘅香港冬天仲係好凍，屋企亦都唔係富庶，所以最值錢保命就係棉胎。之後輾轉搬左係環頭磡到住，亦即係依家嘅樂富。

橫頭磡邨係1962年建成嘅係徒置屋邨黎。當時媽媽同大細舅父，姨媽同公公一齊係山谷道大火後就搬左去呢度住係同一間屋。表舅父一家都係同一條邨，所以玩得好埋。

媽媽成日周不時就會講住係果度嘅經歷（為簡化稱謂，以下以媽媽角度講述）：

• 身為女仔但同細哥哥同佢嘅朋友一齊跑勻成個屋苑去玩BB豆槍，跟住啲男仔一齊跳樓梯
• 細個唔知死打左男同學一錘，家長搵上門所以比呀叔（爸爸，鄉下叫法）罰跪地主，比呀叔打到匿入床下底成晚冇食飯。大哥哥後尾醒左佢幾毫子落街食碗細蓉
• 呀叔係牛奶公司到做，每日都會帶牛奶同雪糕返去比佢食，同學都好羨慕
• 好想學跆拳道但係比呀叔阻止，所以後尾轉左去學跳舞，成日為自己拉到一字馬而感到自豪
• 呀叔非常擅長煮野食，媽媽成日回味佢當年煮嘅五柳石斑
• 媽媽最記得係佢細個果陣，有次係摩士公園俾人打劫，返到屋企大哥哥即刻搵佢蔡李佛拳拳館嘅師兄弟一齊落去公園度「教訓」佢哋一輪。媽媽都估唔到，原來大哥哥學拳係咁有用！
• 係天台小學考試時，原來高年級學生會為低年級監考，細哥哥當時同媽媽同一間學校。媽媽考試時，唔識寫個「雞」字，細哥哥偷偷地幫佢出貓教佢寫
• 細哥哥同朋友打麻雀佢要幫手睇水走鬼因為婆婆會捉佢
• 細哥哥有幸係小學會考考獲佳績（媽媽準確地記得係全港第13名），小學校長登門恭賀屋企同呀叔商討入邊間中學，比佢揀得嘅全部都係傳統名校，全家都好開心
• 細哥哥出左黎做野，第一次食飯就帶媽媽去茶樓食大包，媽媽認為，佢靜係叫大包餵飽佢廢事佢叫得貴！（但係細哥哥其實一直都帶媽媽食唔同嘅好野，不過當日畫面太過經典令媽媽講足成世）
• 電視一播「知否世事常變…」（家變主題曲）屋企就要遲開飯，因為家姐就會目定口呆咁望住電視機唔煮飯

媽媽係中學畢業後就入左法國醫院嘅護士學校，護校畢業後就一直係法國醫院工作咗40年直至退休。佢頭10年係ICU病房工作，有陣時會同我講返果陣嘅經歷，例如要成日幫先人「打包」，會見到走咗嘅人重回病房。

後來去左兒科病房，一做就做左30年，周不時行街見到靚嘅貼紙就會買黎氹小朋友。有誠心感激你嘅家長同小朋友，有專登麻煩你嘅病人，有罕見病例如係有川崎症嘅小朋友。我由細細個每日餐桌嘅話題都離不開係佢係醫院生活嘅經歷。

媽媽臨終時，去返佢開頭工作左好耐嘅ICU（現為SCU）病房度走。總算係百鳥歸巢。

打Drip手

媽媽被同事稱為「打drip手」，因為好多時不論大人定細路哥好幼嘅血管佢都能夠打到。我細個有一段時間以為護士就靜係幫人打針，所以會同人講：「媽媽唔識其他，靜係識打針針㗎咋！」

而因為咁，佢周不時會比人call去唔同病房幫手打drip。有次有個「社團大家姐」入住，同事們都好驚要同佢地打交道，但媽媽不卑不亢咁去打drip。誰不知「社團大家姐」十分好禮貌，每次同醫護交流嘅時候都唔該前唔該後，令媽媽大開眼界。

媽媽經常回味年輕時讀護校同同學一齊去旅行，去過日韓泰同大陸好多地方。但最經典莫過於絲綢之路之旅（上個月住院時電視介紹敦煌魔鬼城時又再提起）。佢經常「講舊時」講左呢個故仔幾十年，又講當時去過龍門石窟，清澈見底嘅九寨溝，敦煌莫高窟。（翻查相片，路線應為西安至敦煌一帶）

當時大陸仲用緊外匯券，靜係比遊客用得，用黎買例如可樂呢啲來佬野。佢有講過去絲綢之路果陣需要用到馬夫，會用可樂黎當貼士。

亦有次係山入面要過一條吊橋，話過到驚心動魄，因為望落下低就係激流。但後面導遊話附近有老虎出沒會好危險。當時同學Celia話：「有老虎就有老虎啦，打死我都唔過架喇！」最終由導遊孭過河。最後仲話要搭飛機返廣州，再係廣州轉火車返香港，返到香港足足訓左2日。

媽媽同我講過爸爸追佢果陣有次試過揸車載住1000朵紅玫瑰去接佢收工，媽媽當時第一個反應係：「嘩！咁樣整要幾錢呀？」之後我爸爸就冇再送過花比佢嚕。

雖然媽媽口係咁講，但當時收到佢一定好開心。

媽媽經常提起我讀幼稚園嘅時候，有次經過黃埔家居庭出去我幼稚園嘅自動玻璃門，因為反應唔切係佢未開果陣就成塊臉撞左落道門。隔離嘅同學仔即刻卡卡大笑。我見到同學咁樣笑我媽媽，即刻睥住佢，手指指想鬧佢。

媽媽見到我咁樣覺得好開心，因為有人保護佢，覺得我係佢心目中嘅英雄。

媽媽教我做人應該視人人平等，對人要親切有禮，職業無分貴賤。佢成日話係病房，收到某位醫生$20嘅利是開心過其他人嘅$100，因為果位醫生對人有善，敬業樂業，令人信服於佢。

媽媽好鍾意食野：以前戲院外嘅煨魷魚，街邊嘅煨番薯，大牌檔嘅韮菜豬紅蠔餅，茶餐廳嘅乾炒牛河，香港仔魚蛋嘅粉面，上海鋪嘅豆漿姿飯，仲有數唔盡嘅野食：艇仔粥，魚蛋燒賣，牛排，蛋撻，格仔餅。佢一年四季都係飲冰水。每日都要食生果：北海道哈密瓜、$20一粒嘅日本提子、王林蘋果、貓山王榴槤、麒麟果等等都係佢嘅至愛。身邊嘅同事朋友對佢嘅印象都係「肥肥地」。

而呢啲嘅飲食習慣，不知不覺間都影響左我。每晚食完飯佢一定會主動切生果比全家，就算夜返屋企都一定有佢滾嘅魚湯飲，有佢嘅時候絕對唔會愁冇好野食。

Bobo 係隻金毛，2003年黎到我地屋企，媽媽一直都好錫佢，因為佢又忠心又得意。媽媽經常買零食，又會比好多人食嘅野比佢－每日都有幾條雞胸撈狗糧食。佢話佢有陣時屋企冇人會同Bobo講心事，Bobo 2018 - 2019年走嘅時候喊得好傷心，日日都掛住佢。

上個月佢入院時，同我地講佢好耐冇夢過Bobo，但果日突然夢到，佢覺得佢係彩虹橋到等緊佢。最後一次入院走之前係屋企又再去睇一睇Bobo幅相，同佢講再見。

媽媽係世界上最溫柔善良嘅人，朋友有咩要幫手佢知道嘅話一定會幫。佢每時每分每秒都守護着身邊嘅人。

以前大舅父舅母身體有事，佢一個人獨力一路返住工一路放工就撲過去照顧佢地，冇半點怨言。基本上一日廿四小時都奉獻俾身邊嘅人。

佢心入面最掛念照顧嘅係我地，佢成日同我講：「你唔好唔開心啦，媽媽見到你唔開心，我都唔會開心架。」萬事以身邊嘅人為先。

媽媽其實正式確診前已經預料到自己有乳癌。但一直話要「與佢共存」，冇去處理。我地當時都尊重佢意願。去到最後有次做運動嘅時候突然盆骨好痛，一睇就發現原來已經骨轉移左。

兩年黎因為呢個病，改變嘅野好多。我每次同佢覆診都要睇關於癌症嘅資料，睇吓有咩適合佢。我自己都開始著重健康，經常睇相關嘅書，開始驗身同做運動。老豆又因為咁要擔當起做好多家務嘅職責。好彩呢兩年我都係在家工作，每日都可以同佢食飯，行街，無悔地走佢人生最後一段路。

我近排成日同媽媽講，如果我地出生係100年後就好，到時醫癌症可能同醫感冒一樣，食粒藥就控制到，我地就唔需要再經歷呢個痛苦嘅過程。

海葬並唔係常見嘅選擇，所以上一個月入院時我再三同媽媽確認佢真係想海葬。我問：「海葬嘅話就冇墓碑，冇人記得你㗎喇喎。」佢拍一拍我心口，話：「我係你地嘅心入面。」

媽媽雖然走左，但佢關於佢嘅回憶，每次諗返起都會覺得好窩心。學佢話齋，其實佢一早係我地心入面。